پاکستان کرکٹ بورڈ (پی سی بی) نے 1998 کے بعد آسٹریلیا کے پہلے دورہ پاکستان کا اعلان کیا ہے۔ شیڈول بھی جاری کر دیا گیا ہے۔

پی سی بی کی جانب سے جاری بیان کے مطابق دونوں ٹیموں کے درمیان تین ٹیسٹ، تین ایک روزہ میچز اور ایک ٹی ٹوئنٹی سیریز اگلے سال مارچ اور اپریل میں ہوگی۔

مہمان ٹیم نیشنل اسٹیڈیم کراچی میں سیریز کا پہلا ٹیسٹ میچ کھیلے گی جس کا آغاز 3 مارچ سے ہوگا۔

سیریز کے باقی دو ٹیسٹ میچز 12 تا 16 مارچ تک راولپنڈی اور 21 تا 25 مارچ تک لاہور میں کھیلے جائیں گے۔

سیریز کے چاروں ایک روزہ میچز 29 مارچ سے 5 اپریل تک لاہور میں کھیلے جائیں گے۔

سیریز میں شامل تمام ٹیسٹ میچز آئی سی سی ٹیسٹ چیمپئن شپ جبکہ تینوں ایک روزہ میچز آئی سی سی کرکٹ ورلڈ کپ سپر لیگ کا حصہ ہوں گے۔

یہ بھی پڑھیں: آسٹریلیا نے 2022 میں ٹیم پاکستان بھیجنے کا عندیہ دے دیا

پی سی بی کے چیئرمین رمیز راجہ نے آسٹریلیا کو دورہ پاکستان پر مبارکباد دیتے ہوئے کہا کہ آسٹریلیا ایک مضبوط ٹیم ہے اور 24 سال بعد پاکستان آنا یہاں کے شائقین کے لیے بہت اچھا لمحہ ہوگا۔

انہوں نے کہا کہ اسی طرح یہ آسٹریلوی کے لیے بھی ایک شاندار موقع ہوگا کہ وہ پاکستان کے تاریخی گراؤنڈز میں کرکٹ کھیل کر یہاں کے عوام کی مہمان نوازی کا شرف حاصل کر سکتے ہیں۔

دوسری جانب کرکٹ آسٹریلیا کے چیف ایگزیکٹو نک ہولے کا کہنا تھا کہ پاکستان کے عوام کرکٹ سے پیار کرتے ہیں اور ہماری آئندہ سال وہاں روانگی وہاں موجود کرکٹ مداحوں کو مزید پرجوش کرے گی۔

انہوں نے کہا کہ پاکستانی ٹیم بہت سے باصلاحیت کھلاڑیوں پر مشتمل ہے جس کی ایک مثال متحدہ عرب امارات میں رواں ٹی ٹوئنٹی ورلڈ کپ میں حالیہ کارکردگی ہے۔

انہوں نے کہا کہ وہ اس دورے کے انعقاد کو یقینی بنانے کے لیے پی سی بی کی کاوشوں کو سراہتے ہیں اور اس سیریز کے لیے لاجسٹک، سیکیورٹی اور کووڈ 19 پروٹوکولز سے متعلق آئندہ چند ماہ پی سی بی سے مسلسل رابطے میں رہیں گے۔

نک ہولے نے کہا کہ ان کے لیے ان کے کھلاڑیوں کو سپورٹ اسٹاف کی حفاظت پہلی ترجیح ہے اور وہ اس سلسلے میں پی سی بی اور متعلقہ ایجنسیوں سے مسلسل رابطے میں رہیں گے۔

مزید پڑھیں: آسٹریلیا بھی پاکستان آ کر سیریز کھیلنے پر رضامند

اس سلسلے میں کرکٹ آسٹریلیا کا وفد دسمبر میں پاکستان کا دورہ کرے گا، اس دوران وہ پی سی بی حکام، ریاستی اور وفاقی حکام سے ملاقات کرکے معاملے کو حتمی شکل دے گا۔

واضح رہے کہ آسٹریلیا نے آخری مرتبہ 1998 میں پاکستان کا دورہ کیا تھا۔ اس دوران مارک ٹیلر کی قیادت میں مہمان ٹیم نے سیریز 0-1 سے اپنے نام کی تھی۔

شیڈول

• 3 تا 7 مارچ: پہلا ٹیسٹ میچ، کراچی
• 12 تا 16 مارچ: دوسرا ٹیسٹ میچ، راولپنڈی
• 21 تا 25 مارچ: تیسرا ٹیسٹ میچ، لاہور
• 29 مارچ: پہلا ون ڈے انٹرنیشنل میچ، لاہور
• 31 مارچ: دوسرا ون ڈے انٹرنیشنل میچ، لاہور
• 2 اپریل: تیسرا ون ڈے انٹرنیشنل میچ، لاہور
• 5 اپریل: واحد ٹی ٹونٹی انٹرنیشنل میچ، لاہور