لاہور: وزیر دفاع پرویز خٹک نے نوشہرہ میں وزیر اعظم عمران خان کے خلاف متنازعہ خطاب کی وضاحت پیش کر دی۔
اپنی وضاحت میں پرویز خٹک نے کہا کہ میں عمران خان کا مخلص اور مقروض ہوں۔ انہوں نے مزید کہا کہ ہماری کوششوں اور عمران خان کی حمایت کی وجہ سے ہم تمام اپوزیشن کو شکست دیں گے ، تمام سیاسی جماعتیں ضمنی الیکشن میں ہمارے حمایت یافتہ امیدوار کے خلاف کھڑی ہیں۔
خیال رہے کہ نوشہرہ میں مقامی لوگوں سے خطاب کرتے ہوئے وزیر دفاع نے کہا تھا کہ اگر میں چاہوں تو وزیراعظم عمران خان کی حکومت ایک دن بھی نہیں چل سکتی ہے۔
وزیر دفاع نے کہا کہ سیاست میں مجھے کوئی دھوکا نہیں دے سکتا کیونکہ میں اراکین اسمبلی کا خیال رکھتا ہوں جبکہ حزاب اختلاف کے لوگ بھی ان کی عزت کرتے ہیں۔
ان کا کہنا تھا کہ اپوزیشن اتحاد پی ڈی ایم میں شامل جماعتوں کے لیڈر عوام کا پیسہ چوری کرتے رہے، اسی چوری پر پردہ ڈالنے کیلئے وہ اب حکومت پر دباؤ ڈالنے کی کوششوں میں مصروف ہیں
پرویز خٹک کا کہنا تھا کہ پی ڈی ایم ایک مصنوعی اتحاد تھا جو ناکام ہو چکا ہے۔ انہوں نے اپنے خطاب میں ملک میں جاری مہنگائی کو سابق حکمرانوں کی پالیسیوں کا نتیجہ قرار دیا اور کہا کہ یہ چیزیں آج عوام کو بھگتنا پڑ رہی ہیں۔