سنگاپور سٹی (این پی جی میڈیا)کرائسٹ چرچ جیسے حملوں کی منصوبہ بندی کرنے والا بھارتی نژاد لڑکا گرفتار کرلیا گیا۔

تفصیلات کے مطابق 15 مارچ کو کرائسٹ چرچ حملے کو دو سال مکمل ہونے پر ایسے ہی حملو ں کا منصوبہ بنانے والے بھارتی نژاد پروٹسٹنٹ مسیحی شہری کو گرفتار کر لیا ہے ،وہ سنگا پور میں مسلمانوں کے خلاف ایسے ہی حملے کرنے کا خواہش مند تھا

سنگا پور کی وزارت ملکی تحفظ کے مطابق نوجوان نے اپنے حملوں کے لیے تفصیلی منصوبہ بندی کر رکھی تھی اور اس سلسلے میں اس نے ضروری تیاریاں بھی کر لی تھیں۔سنگاپور کی اس وزارت نے بتایا کہ تفتیشی ماہرین اس ٹین ایجر کی گرفتاری اور اس سے اب تک کی گئی تفیش کے بعد اس نتیجے پر پہنچے ہیں کہ یہ نابالغ ملزم نفسیاتی طور پر نا صرف تشدد پسند ذہن کا مالک ہے بلکہ اس کی سوچوں میں اسلام کے خلاف ‘بہت زیادہ منفی‘ رویوں کا عنصر بھی انتہائی نمایاں ہے۔

سنگاپور کے حکام نے اس ملزم کی شناخت ظاہر نہیں کی تاہم صرف اتنا بتایا کہ اسے گزشتہ ماہ دسمبر میں گرفتار کیا گیا۔تحفظ وطن کی وزارت کی طرف سے مزید کہا گیا کہ یہ ٹین ایجر انتہائی بنیاد پرستانہ سوچ کا مالک ہے اور اس منصوبہ بندی میں بظاہر اس کا کوئی ساتھی یا شریک ملزم ملوث نہیں تھا۔

حکام کے مطابق یہ نوجوان اپنے تیار کردہ منصوبے کے تحت مسلمانوں پر حملوں کے لیے ایک ایسا بڑا چھرا بھی استعمال کرنا چاہتا تھا، جو عام طور پر قصاب استعمال کرتے ہیں۔پولیس کے مطابق اس نوجوان نے اعتراف کیا کہ وہ اس بات کی بھی امید کرتا تھا کہ وہ ان حملوں کے دوران خود بھی مارا جا سکتا تھا۔