سری نگر(این پی جی میڈیا) مقبوضہ کشمیر میں بھارتی ہیلی کاپٹر گر کر تباہ ہو گیا ہے، حادثے میں ایک پائلٹ ہلاک جبکہ دوسرا زخمی ہوگیا ہے۔
بھارتی میڈیا کے مطابق بھارتی فوجی ہیلی کاپٹر کو حادثہ جموں و کشمیر کی سرحد کے قریب لکھن پور میں پیش آیا۔
بھارتی میڈیا رپورٹس کے مطابق حادثے کے شکار ہیلی کاپٹر میں 2 پائلٹس موجود تھے۔ عینی شاہدین کے مطابق ایڈوانس لائٹ ہیلی کاپٹر دھوروف بجلی کی تاروں میں الجھ کر حادثے کا شکار ہوا۔
رپورٹس میں بتایا گیا کہ حادثے کے بعد دونوں پائلٹس کو زخمی حالت میں تباہ شدہ ہیلی کاپٹر کے ملبے سے نکال کر اسپتال منتقل کیا گیا، جہاں ایک پائلٹ زخموں کی تاب نہ لاتے ہوئے مرگیا، جب کہ دوسرے کی حالت تشویش ناک ہے۔
بھارتی فوج کے مطابق چوپر نے لکھن پور کے علاقے میں آرمی بیس پر کریش لینڈنگ کی کوشش کی اور اس دوران حادثے کا شکار ہوا۔ چوپر پٹھان کوٹ سے واپس آرہا تھا۔