لاہور: بول نیوز کو عدلیہ مخالف پروگرام نشر کرنا مہنگا پڑ گیا، پاکستان الیکٹرانک میڈیا ریگولیٹری اتھارٹی (پیمرا) نے نجی چینل کا لائسنس 30 روز کیلئے معطل کر دیا، ساتھ میں 10 لاکھ روپے کا جرمانہ بھی عائد کر دیا۔

تفصیلات کے مطابق پیمرا کی طرف سے جاری اعلامیے میں بتایا گیا ہے کہ بول نیوز نے 12 جنوری 2021 کو اپنے پروگرام ‘تجزیہ’ میں عدلیہ مخالف مواد نشر کیا۔

اعلامیے میں مزید بتایا گیا کہ پروگرام میں میزبان سمیع ابراہیم اور سینئر رپورٹر میاں داؤد نے ہائی کورٹ کے جج صاحبان کے تقرر اور اس کے طریقہ کار پر بحث کے دوران چیف جسٹس اور دیگر فاضل ججز کے خلاف نہایت غیر مناسب گفتگو کی۔

پیمرا کی جانب سے جاری کی گئی پریس ریلیز میں بتایا گیا کہ میزبان اور رپورٹر دونوں نے آئین پاکستان کی شق 19، 68 اور پیمرا قوانین سمیت ضابطہ اخلاق 2016 کی متعدد شقوں کی خلاف ورزی کی اور عدالت و فاضل ججز کے کنڈکٹ پر غیر ضروری بحث کی۔

پیمرا کا "بول نیوز" کا لائسنس 30 یوم کیلئے معطل اور دس لاکھ جرمانہ عائد pic.twitter.com/tiM3Xoe1XV

— Report PEMRA (@reportpemra) January 22, 2021