وزیر ستان :وزیراعظم عمران خان نے وزیرستان میں 3جی اور 4جی سروس بحال کرنے کا اعلان کردیا ، انہوں نے کہا کہ جو علاقے اور جو لوگ پیچھے رہ گئے ہیں ان کو اوپر لے کر آئیں گے۔ ان میں اسکول اور کالج کھولیں گے۔
تفصیلات کےمطابق وزیراعظم عمران خان آج ایک روزہ دورے پر جنوبی وزیرستان پہنچے جہاں انہوں نے کامیاب جوان پروگرام سے متعلق ہونے والے تقریب میں بطور مہمان خصوصی شرکت کی ، عمران خان نے کامیاب جوان پروگرام کے تحت قبائلی اضلاع میں 1.2ارب روپے تقسیم کیے۔ انہوں نے کہا کہ قبائلی اضلاع میں نوجوانوں کو قرضوں کی فراہمی سے ترقی کی راہ ہموار ہوگی۔ہماری سب سے بڑی طاقت ہمارا نوجوان ہے۔ تعلیم اور روزگار ہمارے لیے سب سے بڑا چیلنج ہے۔عمران خان نے کہا کہ کامیاب جوان پروگرام شروعات ہے، یہاں نوجوانوں کے اندر سب سے زیادہ بے روزگاری ہے۔ ہماری پوری کوشش ہوگی کہ وزیرستان کی ہر طرح سےمدد کی جائے۔
عمران خان نے کہا کہ آئندہ سال وزیرستان کے نوجوانوں کو اور زیادہ قرضے دیئے جائیں گے۔ یہاں کے لوگ ہمیشہ پاکستان کے لیے کھڑے ہوئے ہیں۔ہم غریب طبقے کو اوپر لانے کیلئے پوری کوشش کریں گے۔ یہاں سے ٹانک جانا لوگوں کے لیے بہت مشکل ہے۔ان کا کہنا تھا کہ وزیرستان میں 70فیصد لوگ وہ ہیں جو غربت کی لکیر سے نیچے ہیں، احساس پروگرام کے تحت غریب لوگوں کو پیسے دیئے جائیں گے۔غریب عورتوں کو گھر چلانے کیلئے مویشی دیئے جائیں گے، ہماری پوری کوشش ہوگی کہ اس علاقے کو اوپر اٹھایا جائے۔
وزیر اعظم عمران خان نے مزید کہا کہ کہ پاکستان کو اس وقت گھی اور آئل باہر سے منگوانا پڑتا ہے۔ دنیا میں وزیرستان زیتون کی کاشت کیلئے بہترین علاقہ ہے۔جوبھی علاقے پیچھے رہ گئے ہیں وہاں پر اسکالر شپس دی جائیں گی۔ یہاں کے ہر خاندان کو ہیلتھ کارڈ دیا جائے گا، جس کے ذریعے 7لاکھ روپے تک کا علاج کرایا جاسکتا ہے۔