لاہور(این پی جی میڈیا)پاکستان کرکٹ ٹیم کے سابق فاسٹ بائولر محمد عامر نے انٹرنیشنل کرکٹ میں مشروط طور پر واپسی پر رضامندی ظاہر کردی ہے۔

‏ تفصیلات کے مطابق سماجی رابطے کی ویب سائٹ ٹوئٹر پر پیغام جاری کرتے ہوئے محمد عامر نے کہا کہ ’ میں اس بات کی وضاحت کرنا چاہتا ہوں کہ میں صرف اسی وقت پاکستان کے لیے دستیاب ہوں گا جب یہ مینجمنٹ چھوڑ جائے گی، اس لیے اپنی سٹوری بیچنے کے لیے جعلی خبریں پھیلانا چھوڑ دیں‘۔

I would like to clarify that yes I will be available for Pakistan only once this management leaves. so please stop spreading fake news just to sell your story.

— Mohammad Amir (@iamamirofficial) January 18, 2021

خیال رہے کہ گزشتہ روز میڈیا پر یہ خبریں چلنا شروع ہوئیں کہ محمد عامر نے ریٹائرمنٹ واپس لینے کا اشارہ دیا ہے اور وہ بورڈ کو خود اس حوالے آگاہ کریں گے۔

محمد عامر کی ریٹائر منٹ کی واپسی کے حوالے سے سوشل میڈیا پر ایک بحث شروع ہو گئی اور اس بحث کے بعد فاسٹ بائولر نے سوشل میڈیا پر اپنا ایک بیان جاری کیا ہے۔

یاد رہے کہ محمد عامر نے گزشتہ ماہ اعلان کیا تھا کہ انہیں موجودہ مینجمنٹ نے ذہنی اذیت پہنچائی ہے اس لیے وہ اب انٹر نیشنل کرکٹ نہیں کھیلنا چاہتے۔

فاسٹ بائولر کے اس بیان کے بعد پی سی بی نے عامر سے بات کی اور پھر بورڈ نے اعلان کیا کہ وہ محمد عامر کے فیصلے کا احترام کرتے ہیں اور انہیں انٹر نیشنل کرکٹ کے لیے زیر غور نہیں لایا جائے گا۔

‏چند روز قبل محمد عامر نے ہیڈ کوچ مصباح الحق اور بائولنگ کوچ وقار یونس کے بارے میں دوبارہ وہی الفاظ دہرائے جن کی بنیاد پر انہوں نے انٹر نیشنل کرکٹ سے الگ ہونے کا فیصلہ کیا تھا۔

‏مصباح الحق اور وقار یونس محمد عامر کے الزامات کی تردید کر چکے ہیں اور ان کا کہنا ہے کہ انہوں نے ذاتی طورپر محمد عامر کو نشانہ نہیں بنایا بلکہ پرفارمنس کی بنیاد پر محمد عامر کو ریسٹ دیا گیا تھا۔