اسلام آباد: پاکستان کی قومی ایئر لائن پی آئی اے کے ایک مسافر طیارے کو ملائیشیا کے دارالحکومت کوالالمپور میں روک لیا گیا ہے۔
تفصیلات کے مطابق پی آئی اے کے ترجمان کے مطابق ملائیشیا کی ایک مقامی عدالت نے یکطرفہ فیصلے کے تحت پی آئی اے کے ایک طیارے کو روک لیا ہے جس کا قانونی تنازع قومی ایئر لائن اور ایک فریق کے مابین برطانوی عدالت میں زیر التوا ہے۔
ترجمان کی جانب جاری بیان میں کہا گیا ہے کہ پی آئی اے مسافروں کی دیکھ بھال کر رہی ہے اور ان کے لیے متبادل پرواز کا بندوبست کیا جا رہا ہے۔
بیان کے مطابق یہ ناقابلِ قبول صورتحال ہے جس میں پی آئی اے حکومت کے تعاون سے معاملے کو سفارتی چینلز استعمال کرتے ہوئے متعلقہ فورم پر اٹھایا جا رہا ہے۔
اطلاعات کے مطابق پی آئی اے کی پرواز پی کے 895 کراچی سے آج کوالالمپور پہنچی تھی۔ پی آئی اے نے 2015 میں بوئنگ 777 طیارہ ویتنام کی کمپنی سے لیز پر حاصل کیا تھا ۔
گزشتہ چند ماہ سے اس کے واجبات کی ادائیگی کے حوالے سے تنازع چل رہا تھا اور کمپنی معاملہ عدالت لے گئی تھی۔
خیال رہے کہ پاکستان کی قومی ایئر لائن پی آئی اے گزشتہ ایک سال سے مشکلات کا شکار ہے۔ پائلٹس کے لائسنسز پر شکوک و شبہات سامنے آنے کے بعد یورپ میں پی آئی اے پر پابندی عائد کی جا چکی ہے۔