نیویارک: واٹس ایپ انتظامیہ نے پرائیویسی پالیسی سے متعلق سوشل میڈیا پر چلنے والی غلط خبروں کی وضاحت کرکے صارفین کی بڑی مشکل آسان کر دی۔

خیال رہے کہ واٹس ایپ صارفین کا نجی ڈیٹا فیس بک کے ساتھ شیئر کرنے کی نئی پالیسی کے باعث لوگ دوسری ایپلی کیشنز پر تیزی سے منتقل ہو رہے ہیں۔

واٹس ایپ انتظامیہ نے وضاحت دیتے ہوئے کہا کہ نئی پالیسی صارفین کی پرائیویسی پر اثر انداز نہیں ہو گی ، صارفین کے پیغامات انکرپٹڈ ہی رہیں گے ، اس لیے صارفین کو پریشان ہونے کی ضرورت نہیں۔ واٹس ایپ انتظامیہ نے مزید تفصیلات بتاتے ہوئے کہا کہ صارف کی گفتگو کو واٹس ایپ اور فیس بک نہیں دیکھ سکے گی۔

ادھر پرائیویسی پالیسی کے پیش نظر پاکستان نے واٹس ایپ کے مقابلے میں اپنی سوشل ایپ تیار کرنے کا فیصلہ کیا ہے۔

ایک قومی اخبار کی رپورٹ کے مطابق مذکورہ سوشل ایپ وزارت انفارمیشن ٹیکنالوجی اور آئی ٹی کے ماہرین تیار کریں گے جو کہ ایک جدید سماجی رابطہ ایپ ہوگی جس مکمل تحفظ پر مبنی بنانے کیلئے خاص طور پر اقدامات کیے جائیں گے۔

پاکستان کی اپنی نئی سوشل ایپ میں مسیجز، وائس کال، ویڈیو کال سمیت دیگر تمام خصوصیات کو بھی شامل کیا جائے گا، اس حوالے سے تیاریاں حتمی مراحل میں ہیں اور وفاقی کابینہ کی منظوری کے بعد اس سماجی رابطہ ایپ پر باقاعدہ کام شروع ہوجائے گا۔

میڈیا رپورٹ میں وفاقی وزیر آئی ٹی امین الحق کا حوالہ دیتے ہوئے بتایا گیا ہے کہ وزارت آئی ٹی کی جانب سے ملکی سطح پر عوام کی سہولت کے لیے سماجی رابطہ ایپ بنانے کا فیصلہ کرلیا گیا ہے، اس ایپ میں ممکنہ طور پر موبائل نمبر اور شناختی کارڈ سے رجسٹریشن ہوگی۔

اس کے علاوہ اس میں لوگوں کے ڈیٹا اور پیغامات کا مکمل تحفظ ہوگا اور صارف کی ذاتی معلومات کو بھی تحفظ حاصل ہوگا جب کہ اس رابطہ ایپ میں غیر اخلاقی مواد کو شیئر نہیں کیا جاسکے گا۔

یہ سماجی رابطہ ایپ تجرباتی بنیادوں پر تیار کرنے کے بعد پہلے مرحلے میں بڑے شہروں میں شروع کی جائے گی جس کے بعد اس کا دائرہ کار پورے ملک میں وسیع کردیا جائے گا ، اس مرحلے کے بعد عالمی سطح پر بھی اس سماجی رابطہ ایپ کو متعارف کرایا جائے گا۔