نیویارک: بھارت کو سلامتی کونسل کی 2 اہم کمیٹیوں کی سربراہی نہ مل سکی ، بھارت سلامتی کونسل کی کمیٹی 1540 اور کمیٹی 1267 کی چیئرمین شپ حاصل کرنا چاہتا تھا۔

تفصیلات کے مطابق کمیٹی کے رکن ممالک کا بھارت پر عدم اعتماد کا اظہار، بھارت القاعدہ ، داعش پر پابندیوں کی کمیٹی کا سربراہ بننا چاہتا تھا ، بھارت افغان امور ، ایٹمی عدم پھیلاؤ کی کمیٹی کا سربراہ بننا چاہتا تھا۔

خیال رہے کہ کمیٹی 1267 القاعدہ اور داعش پر پابندیوں کا اختیار رکھتی ہے جبکہ کمیٹی 1540 ایٹمی عدم پھیلاؤ اور افغان امور سے متعلق ہے۔ اس حوالے سے بھارت سلامتی کونسل کے 15 ارکان کی حمایت لینے میں ناکام رہا۔

رکن ممالک کا مؤقف ہے کہ بھارت کمیٹی کو اپنے عزائم کیلئے استعمال کرسکتا تھا، بھارت کے رکن بننے سے افغان امن عمل پر منفی اثرات پڑسکتے ہیں۔ بھارت نے چیئرمین شپ کیلئے سرتوڑ کوشش کی مگر ناکام رہا۔

رکن ممالک کا کہنا تھا کہ بھارت رکن بن کر پاکستان کیخلاف منفی ایجنڈے کو بڑھانا چاہتا ہے۔ رکن ممالک نے واضح کیا کہ بھارت ایٹمی عدم پھیلاؤ سے متعلق کمیٹی کی چیئرمین شپ کیلئے مناسب ملک نہیں۔

واضح رہے کہ پاکستان نے گزشتہ سال دونوں کمیٹوں کو 4 بھارتی شہریوں پر پابندی عائد کرنے کا کہا تھا۔ پاکستان نے ٹی ٹی پی ، جماعت الاحرار کو بھارتی فنڈنگ سے متعلق آگاہ کیا تھا۔

یاد رہے کہ بھارت پاکستان کا ازلی دشمن ہے جو ہمسایہ ملک کے امن کو برباد کرنے کے درپے ہے۔ بھارت پاکستان کی معاشی ترقی سے خوش نہیں ہے اس لیے اُس کی کوشش ہوتی ہے کہ یہاں دہشت گردی کروا کر ترقی کو روکا جائے۔