نیویارک: ہیٹ باکس نامی ایجاد اندرموجود کھانے کو فوری طور پرچولہے اور مائیکروویو کے بغیر گرم کرکے اسے کھانے کے قابل بناتی ہے۔ اس لنچ باکس کو یو ایس بی سے چارج کیا جاتا ہے۔

آج کے اس دور میں دنیا ہر دن نت نئی ٹیکنالوجی کا نمونہ پیش کرتی ہے۔ اسی طرح کھانا گرم کرنے کے اہم مسئلے کو بھی حیرت انگیز ٹیکنالوجی سے آسان بنادیا گیا ہے۔

کیونکہ ہرجگہ کھانا گرم کرکے نہیں کھایا جاسکتا سفر میں ہر جگہ مائیکروویو اون یا بجلی کی سہولت بھی موجود نہیں ہوتی اسی لیے اس ہیٹ باکس کو ایجاد کیا گیا ہے جو کہ بھاپ کی بدولت اندر رکھے جانے والا کھانے کو گرم کردیتا ہے۔

اس طرح آپ کسی بھی وقت اور دنیا کے کسی بھی کونے میں گرم اور مزیدار کھانے کا لطف اٹھا سکتے ہیں۔

ہالینڈ کے ایک ہونہار انجنیئر نے کھانے کو گرم رکھنے والا یہ لنچ باکس تیار کیا ہےجسے آپ چارج کرنے کے بعد کہیں بھی لے جاسکتے ہیں۔ آپ کو کھانے سے قبل بس اتنا کرنا ہوگا کہ لنچ باکس پر موجود سوئچ آن کردیں جس کے بعد اندر موجود اسٹیم غذا کو اچھی طرح گرم کردیتی ہے۔

اس کے لیے صرف 20 ملی لیٹر پانی اندر انڈیلنا ہوتا ہے جو اندر موجود اسٹیل کے برتن میں چلا جاتا ہے۔ اس کے اوپر ایک ڈھکنا رکھ کر کھانے کو بند کیا جاسکتا ہے اور یوں گرم بھاپ کھانے کے ہر حصے سے ہوتی ہوئی اسے فوری طور پر گرم کردیتی ہے۔

آپ کا جب بھی گرما گرم کھانے کا دل چاہے تو اوپر کا ڈھکن کھولیں اور اندرکی پرت کو اتاریں اس کے بعد باہر کا بٹن دبادیں جس سے اسٹیل کے اندر دھاتی مٹیریئل گرم ہوگا اور اس کے ساتھ پانی کھول کر اندر گھومنے لگے گا۔ لنچ باکس میں موجود اندرونی والو بھاپ کا دباؤ برقرار رکھتے ہیں اور یوں برتن کے اندر کا دباؤ خوف ناک حد تک بلند نہیں ہوتا۔

واضح رہے کہ اس طرح آپ ایپ کے ذریعے بھی لنچ پاکس کی حرارت کو کم، درمیانہ اور بلند پر رکھ سکتے ہیں۔ اس لنچ باکس چولہے کی قیمت 150 ڈالر رکھی گئی ہے۔