لاہور:مسلم لیگ ن کے رہنما رانا ثنا اللہ نے کہا ہے کہ پی ڈی ایم کی تحریک سے عوامی دباؤ میں اضافہ ہوتا رہے گا۔ ہم استعفے دیں گے اوراسمبلیوں کو تحلیل کیا جائے گا جبکہ فیصلہ کن لانگ مارچ کے بعد استعفوں کا فیصلہ ہو گا۔

لاہور میں میڈیا سے بات کرتے ہوئے لیگی رہنما رانا ثنااللہ نے کہا کہ پاکستان ڈیمو کریٹک موومنٹ (پی ڈی ایم) تحریک میں حکومت پرعوامی دباؤ کا سلسلہ جاری رہے گا اور نااہل ٹولے کو اتار کر ملک و قوم کی جان چھڑائی جائے گی۔گزشتہ روز پی ڈی ایم اجلاس میں پیپلز پارٹی نے اپنا مؤقف پیش کیا اور استعفوں پر پیپلز پارٹی نے حالات کے مطابق مؤقف دیا۔ جلسوں، احتجاج، ریلیوں اور مظاہروں سے متعلق پیپلز پارٹی پرعزم ہے۔لانگ مارچ کے راولپنڈی یا اسلام آباد میں پڑاؤ سے متعلق فیصلہ قیادت کرے گی۔

سابق وزیر قانون پنجاب نے کہا کہ سی سی پی او لاہور کی تبدیلی سے پولیس سے متعلق منفی تاثر قائم ہوا ہے ، میں سی سی پی او لاہورعمر شیخ سے اظہار ہمدردی کرتا ہوں اور نئے سی سی پی او سے کہتا ہوں قانون اور انصاف کے مطابق کام کریں۔ انہوں نے کہا کہ پولیس افسران ان لوگوں کے ملازم بننے کے بجائے فرض ادا کریں ۔ رہنما مسلم لیگ ن نے کہا کہ گھبرایا ہوا شخص کبھی کہتا ہے کہ میں گھبرایا ہوا ہوں ؟ وزیر اعظم کے ترجمانوں کی فوج دفاع کے لیے روز بیٹھی ہوتی ہے۔