اترپردیش: پاکستانی خاتون تین دہائی قبل سے ہندوستان میں رہ رہی تھی انہیں حالیہ سال کے اوائل میں اترپردیش کے ایٹا ضلع میں عبوری گاؤں کا سربراہ بنادیا گیا تھا۔

بھارتی میڈیا رپورٹس نے انکشاف کیا ہے کہ خاتون کی شناخت بانو بیگم کے نام سے ہوئی ہے اور جن کی رہائش کراچی کی ہے۔

ان کا مزید کہنا ہے کہ پاکستانی خاتون 35 سال قبل ایٹا میں ایک رشتے دار کی شادی میں شرکت کے لیے ہندوستان آئی تھی اور توسیع شدہ ویزے پر تب سے یہیں مقیم ہے۔ صرف یہی نہیں خاتون کی ایک مقامی رہائشی سے شادی بھی ہوگئی ہے۔

اگرچہ خاتون کو کبھی ہندوستانی شہریت نہیں دی گئی، لیکن 65 سالہ خاتون کو طویل مدتی ویزا پر آدھار، ووٹر کی شناخت اور دیگر دستاویزات مل گئیں۔

2015 میں اس خاتون نے گواڈو گرام پنچایت سے بلدیاتی انتخابات لڑے اور نمائندہ منتخب ہوئیں۔

تاہم اس مہینے کی شروعات میں گاؤں کے ایک رہائشی نے حکام کو بتایا کہ بانو بیگم پاکستانی شہری ہے جس کے بعد وہ استعفی دینے پر مجبور ہوگئیں۔

اس کے بعد ضلعی پنچایت کے راج افسر ‘ڈی پی آر او’ نے اس کے خلاف ایف آئی آر درج کرنے کا بھی حکم دیا ہے۔