قومی کرکٹ ٹیم کے آل رائونڈر شعیب ملک اور ثانیہ مرزا نے مداحوں کے لئے نئے سال کا پیغام جاری کردیا

اسلام آباد:پاکستان کرکٹ ٹیم کے آل رائونڈر شعیب ملک اور ان کی اہلیہ بھارتی ٹینس سٹار ثانیہ مرزا نے مداحوں کے لئے نئے سال کا پیغام جاری کردیا ہے۔

تفصیلات کے مطابق دونوں میاں بیوی نے جاری ویڈیو پیغام میں کہاکہ 2020ہم سب کے لئے بہت مشکل رہا ہے اور ہم سب میں سے کئی لوگوں نے اپنے پیاروں کو بھی کھودیا ہے ۔

انہوں نے کہاکہ اس نئے سال کے لئے وہ اپنے تمام مداحوں کے لئے دعا گو ہیں کہ یہ نیا سال ہر انسان کے لئے خوشیاں ، سکون اور ڈھیر ساری محبت لے کر آئے۔

نئے سال کے حوالے سے جاری کردہ ویڈیو پیغام کو شعیب ملک اور ثانیہ مرزا کے مداحوں کی جانب سے خوب سراہا جارہا ہے اور دونوں میاں بیوی کے لئے نیک خواہشات کا بھی اظہار کیا جارہا ہے۔

بھارتی ٹینس سٹار ثانیہ مرزا اور پاکستانی کرکٹ ٹیم کے سابق کپتان شعیب ملک نے اگرچہ ایک دہائی قبل اپریل میں شادی کی تھی تاہم اب بھی ان کی شادی اور تعلقات کی خبریں پاکستان اور بھارت کے میڈیا کی زینت بنتی ہیں۔اور تاحال لوگ ان کی محبت اور تعلقات کے حوالے سے بہت ساری معلومات حاصل کرنے کے لیے بے تاب دکھائی دیتے ہیں۔

دونوں کی شادی کو کامیاب شادی تصور کیا جاتا ہے اور دونوں ایک ساتھ مسلسل زندگی نہ گزارنے کے باوجود ایک دوسرے کے بہترین ہم راز ہیں اور 2018 ء میں جوڑے کے ہاں پہلے بچے کی پیدائش بھی ہوئی تھی۔

گزشتہ برس اپریل میں ہی دونوں نے شادی کی دسویں سالگرہ بھی منائی تاہم اس بار وہ کورونا وائرس کی وجہ سے ایک ساتھ سالگرہ نہیں منا پائے تھےلیکن اب شادی کو ایک دہائی مکمل ہونے کے بعد ثانیہ مرزا نے ایک انٹرویو میں پاکستانی کرکٹر سے تعلقات استوار ہونے اور اس سے شادی کرنے کے راز سے پردہ اٹھاتے ہوئے بتایا کہ کس طرح دو مخالف ممالک کے لوگوں نے شادی کی۔

ثانیہ مرزا نے پاکستانی سپورٹس اینکر زینب عباس کو یوٹیوب پر آن لائن انٹرویو دیتے ہوئے شعیب ملک سے محبت اور اس سے شادی کرنے کے راز سے پردہ اٹھاتے ہوئے اپنے شوہر کو دنیا کا سب سے ان رومانٹک انسان بھی قرار دیا۔

زینب عباس کی جانب سے پوچھے گئے سوال کے جواب میں ثانیہ مرزا نے بتایا کہ ان کے اور شعیب ملک کے درمیان ابتدائی طور پر تعلقات استوار ہوئے تھے جس کے بعد ہی ان کا تعلق رشتے میں بدلا۔

بھارتی ٹینس سٹار نے بتایا کہ شعیب ملک دل کے سچے تھے اور انہوں نے ان سے کچھ ہی وقت بعد کہا کہ وہ ان سے شادی کرنا چاہتے ہیں اور وہ اس معاملے میں ان کے گھروالوں سے بھی بات کریں گے۔

انہوں نے شعیب ملک کی تعریف کرتے ہوئے بتایا کہ وہ دل کے صاف اور سچے ہیں، انہوں نے ان سے کوئی بات نہیں چھپائی اور انہیں صاف صاف کہا کہ اگر وہ ان سے شادی کرنا چاہتی ہیں تو وہ اس حوالے سے ان کے اہل خانہ سے بھی بات کریں گے۔