مائونٹ منگنوئی :قومی کرکٹ ٹیم کے سابق کپتان اظہر علی نے کہاہے کہ ماؤنٹ مانگانوئی ٹیسٹ میں اب پچ پر بیٹسمینوں کے لیے شاٹ کھیلنا مشکل ہو چکا ہے ، کوشش ہے سیٹ ہونے کے بعد جتنا لمبا کھیلا جاسکے کھیلیں۔

تفصیلات کے مطابق اظہر علی نے کہا کہ ٹیسٹ میچ کے پانچویں روز بیٹنگ کرنا چیلنجنگ ہوتا ہے، ہماری کوشش ہو گی کہ لمبی پارٹنر شپ لگائیں لیکن پچ بالکل اب ویسی ہو گئی ہے جیسے ایشیا میں پانچویں روز ہوتی ہے، اس پچ پر اسپنرز کو زیادہ باؤنس ملتا ہے اور پانچویں روز بھی مزید ملے گا لیکن نیوزی لینڈ نے اب تک فاسٹ بولنگ پر انحصار کیا ہوا ہے۔

قومی کرکٹر نے کہاکہ بیٹسمینوں کے لیے شاٹ کھیلنا مشکل ہو چکا ہے، کوشش یہی ہے کہ سیٹ ہونے کے بعد جتنا لمبا کھیلا جاسکے کھیلیں، کوشش کریں گے کہ میں اور فواد عالم اپنی پارٹنر شپ کو لمبا لے کر جائیں کیونکہ پچ ایسی ہے کہ اگر آپ سیٹ ہو جائیں تو پورا دن بھی کھیل سکتے ہیں۔

اظہر علی نے پہلے سیشن کو اہم قرار دیتے ہوئے کہا کہ جب تین وکٹیں گر چکی ہوں تو دباؤ ہوتا ہے، اس صورتحال میں پازیٹو رہنے کی کوشش کی جاتی ہے، ہمارا پلان یہی ہے کہ جو بیٹسمین سیٹ ہوجائے وہ اس پچ پر زیادہ وقت گزاریں۔

سابق کپتان نے نیوزی لینڈ کے فاسٹ بولر نیل ویگنر کے ان فٹ ہونے کے باوجود کھیلنے کی تعریف کی اور کہا کہ نیل ویگنر نے ہم سب کے لیے ایک مثال قائم کی ہے، انجری کے باوجود کھیلنے پر ہم نیل ویگنر کی بہت عزت کرتے ہیں، دوسری اننگز سے پہلے وارم اپ کے دوران لگا وہ نہیں کھیلیں گے لیکن وہ پاؤں میں فریکچر کے باوجود میچ کھیل رہے ہیں جو قابل ستائش ہے، نیل ویگنر نے یہ ثابت کردیا کہ اپنے ملک کی نمائندگی سے بڑھ کر کچھ نہیں۔