مائونٹ منگنوئی:پاکستان کرکٹ ٹیم کے بیٹنگ کوچ یونس خان نے کہا ہے کہ ‏فہیم اشرف ایک آل راؤنڈر کا کردار ادا کر رہے ہیں، امید ہے فہیم اشرف عمدہ کارکردگی کا سلسلہ جاری رکھیں گے جبکہ ‏فہیم اشرف کے کھیل میں بہتری آرہی ہےاوروہ اچھے باؤلنگ آل راؤنڈر بننے کی صلاحیت رکھتے ہیں۔

تفصیلات کے مطابق سابق کپتان اور موجودہ قومی کرکٹ ٹیم کے بیٹنگ کوچ کے فرائض انجا م دینے والے یونس خان نےنیوزی لینڈ کے خلاف پہلے ٹیسٹ میچ کے حوالے سے بات کرتے ہوئے کہا کہ ٹاپ آرڈر سے رنز نہیں ہو ئے لیکن انہوں نے کریز پر وقت ضرور گزارا، فہیم اشرف کے لیے سٹیج تیار تھا، جب وہ کریز پر پہنچے تو پچاس اوورز ہو چکے تھےجبکہ ٹاپ آرڈر میں ‏ایک اچھی پارٹنر شپ ہو جاتی تو ابھی صورتحال مختلف ہوتی ۔

بیٹنگ کوچ نے مزید کہا کہ‏محمد رضوان کی جتنی تعریف کی جائے کم ہے، وہ انگلینڈ میں بھی اچھا کھیلے اوران کی آج کی اننگز بالکل مختلف تھی جبکہ ‏محمد رضوان ایک میچور اور سینئر کھلاڑی کے روپ میں نظر آ رہے ہیں اوروہ اسی طرح کھیلتے رہے تو پاکستان کو بہت فائدہ ہوگا۔

یونس خان کا کہنا تھاکہ کپتان کی اپنی کارکردگی بہت اہمیت رکھتی ہے، پرفارمنس اچھی ہو تو فیلڈ میں فیصلے بھی اچھے ہوتے ہیں،‏ کھیل کے دوسرے روز شان مسعود کا آؤٹ ہونا پاکستانی ٹیم کے لیے بدقسمت رہا، تیسرے روز ناٹ آؤٹ سیٹ بیٹسمین کھیل رہے ہوتے تو بہت فائدہ ہوتا جبکہ ‏پارٹنر شپ لگنے سے دوسری ٹیم پر دباؤ ہوتا ہے، اگر اننگز میں سو رنز کی دو سے تین پارٹنر شپ ہو جائیں تو بہت فائدہ ہوجاتا ہے اور‏ نیوزی لینڈ کی اننگز میں بھی اسی طرح ہوا، انہوں نے ایک لمبی اور دو چھوٹی چھوٹی پارٹنر شپ لگائیں اور چارسو رنز بنالیے۔

واضح رہے کہ پاکستانی ٹیم نیوزی لینڈ کے خلاف پہلی اننگز میں 239رنز بناکر آئوٹ ہوگئی جبکہ میزبان ٹیم نے اپنی پہلی اننگز میں 431رنز بنائے۔‏