کراچی :پاکستان اسٹاک مارکیٹ میں گذشتہ ہفتے مندی کا رجحان رہا اور کے ایس ای 100 انڈیکس 300 پوائنٹس گھٹ گیا جس کی وجہ سے انڈیکس 43700 پوائنٹس سے کم ہوکر 43400 پوائنٹس کی کم سطح پر بند ہوا۔

تفصیلات کے مطابق مندی کے سبب مارکیٹ میں سرمایہ کاروں کے 79 ارب روپے ڈوب گئے۔ کاروباری مندی کے نتیجے میں سرمائے کا مجموعی حجم 80 کھرب روپے سے کم ہو کر 79 کھرب روپے رہ گیا۔

تاہم 50 فیصد حصص کی قیمتیں بھی گھٹ گئیں اور انڈیکس 0.74 فیصد کم ہو گیا۔ 25 دسمبر کو قائداعظم کی یوم پیدائش کے موقع پرعام تعطیل کے سبب پاکستان اسٹاک مارکیٹ میں گذشتہ ہفتے کاروباری سرگرمیاں 4 دن تک محدود رہیں۔

دو دن مندی کے رجحان کی وجہ سے کے ایس ای 100 انڈیکس 833.62 پوائنٹس لوز کر گیا۔ تاہم 2 دن کی تیزی سے انڈیکس نے 509.83 پوائنٹس ریکور کئے۔

تاہم مارکیٹ میں مجموعی طور پر مندی کے اثرات غالب رہے۔ ہفتہ وار رپورٹ کے مطابق پاکستان اسٹاک مارکیٹ میں گذشتہ ہفتے کے ایس ای 100 انڈیکس میں 323.79 پوائنٹس کی کمی واقع ہوئی جس سے کے ایس ای 100 انڈیکس 43740.56 پوائنٹس سے کم ہو کر43416.77 پوائنٹس ہو گیا۔

اسی طرح کے ایس ای 30 انڈیکس 148.49 پوائنٹس کی کمی سے 18246.21 پوائنٹس سے گھٹ کر 18097.72 پوائنٹس ہو گیا۔ جبکہ کے ایس ای آل شیئرز انڈیکس 30738.36 پوائنٹس سے کم ہو کر30444.49 پوائنٹس پر بند ہوا۔

مندی کے سبب مارکیٹ کے سرمائے میں 79 ارب11 کروڑ 12 لاکھ 47 ہزار 832 روپے کی کمی ریکارڈ کی گئی جس کے نتیجے میں سرمائے کا مجموعی حجم 80 کھرب 28 ارب 28 کروڑ 90 لاکھ 79 ہزار380 روپے سے کم ہو کر 79 کھرب 49 ارب 17 کروڑ 78 لاکھ 31 ہزار 548 روپے ہو گیا۔

پاکستان اسٹاک مارکیٹ میں گذشتہ ہفتے ٹریڈنگ کے دوران ایک موقع پر انڈیکس 43791.06 پوائنٹس کی بلند سطح کو چھو گیا تھا تاہم مندی کی لہرآنے سے انڈیکس ایک موقع پر 42757.94 پوائنٹس کی کم ترین سطح پر دیکھا گیا تھا۔

پاکستان اسٹاک مارکیٹ میں گذشتہ ہفتے زیادہ سے زیادہ 25 ارب روپے مالیت کی 57 کروڑ 5 لاکھ 830 ہزار حصص کے سودے ہوئے جبکہ کم سے کم 17 ارب روپے مالیت کے37 کروڑ 89 لاکھ 38 ہزار حصص کے سودے ہوئے تھے۔

پاکستان اسٹاک مارکیٹ میں گذشتہ ہفتے مجموعی طور پر 1604 کمپنیوں کا کاروبار ہوا جس میں سے 720 کمپنیوں کے حصص کی قیمتوں میں اضافہ، 799 میں کمی اور 85 کمپنیوں کے حصص کی قیمتوں میں استحکام رہا۔

کاروبار کے لحاظ سے ورلڈ کال ٹیلی کام، ٹی آر جی پاک لمیٹڈ، انوسٹ بینک، پاک ریفائنری، پاک الیکٹرون، ایونسن لمیٹڈ، یونٹی فوڈز لمیٹڈ، بائیکو پیٹرولیم، حیسکول پیٹرول، پی آئی اے، ٹیلی کارڈ لمیٹڈ، یونٹی فوڈز لمیٹڈ، ازگارڈ نائن، آغا اسٹیل انڈسٹریز، غنی گلوبل، پاک انٹر نیشنل بلک، نیٹ سول ٹیکنالوجی، پاور سیمنٹ اورفوجی سیمنٹ سر فہرست رہے۔