لاہور: وزیراعظم کے مشیر برائے تجارت و سرمایہ کاری عبدالرزاق داؤد اور صوبائی وزیر صنعت و تجارت میاں اسلم اقبال سے آج پنجاب کے صنعت کاروں اور تاجروں نے ملاقات کی۔

تصیلات کے مطابق دربار ہال سول سیکرٹریٹ میں ہونے والی ملاقات کے دوران صنعت کاروں کے مسائل، صنعتکاری اور دیگر ایشوز پر بات چیت ہوئی۔ صوبائی وزیر میاں اسلم اقبال نے پنجاب میں صنعت کاری کے عمل کے فروغ اورآئندہ کے لائحہ عمل سے متعلق بریفنگ دی۔

وزیراعظم کے مشیر برائے تجارت و سرمایہ کاری عبدالرِزاق داؤد نے صنعتکاروں سے گفتگو کرتے ہوئے کہا کہ میں اسلام آباد میں صنعتکاروں کا نمائندہ ہوں اور آپ کے تمام جائز مسائل حل کراؤں گا۔

انہوں نے کہا کہ یکم جنوری سے صنعتوں کے لئے خام مال کی درآمد پر ڈیوٹی میں 6 فیصد کمی کی جارہی ہےـ خام مال پر درآمدی ڈیوٹی میں کمی سے صنعتوں کو فائدہ ہوگاـ

مشیر تجارت نے کہا کہ انڈسٹریلائزیشن کی لانگ ٹرم پلاننگ کے لئے صنعت کار تجاویز دیں۔ مشیر تجارت عبدالرزاق داؤد نے کہا کہ مصنوعات کی سرٹیفیکیشن کیلئے سٹیٹ آف دی آرٹ ٹیسٹنگ لیب کا قیام بے حد ضروری ہےـ

جہاں صنعتیں لگ چکی وہاں صنعت کی سہولت کے لئے اسے انڈسٹریل اسٹیٹ کا درجہ ملنا چاہیےـ برآمدات پر ٹیکس ریبیٹ، ٹیکسوں کے ریفنڈ اور ڈی ایل ٹی ایل کے معاملات جلد حل ہوں گےـ

مشیر تجارت عبدالرزاق داؤد نے کہا کہ بزنس کمیونٹی مشینری کی درآمد کیلئے حکومت کے ٹیمپریری اکنامک ریفنانس فیسیلٹی (TERF)سے فائدہ اٹھائیں اوروفاقی حکومت کی 100 ارب روپے کی یہ سکیم 31 مارچ 2021 تک جاری رہے گی۔

صوبائی وزیر صنعت وتجارت میاں اسلم اقبال نے کہا کہ پنجاب میں نئی صنعتیں لگانے کیلئے اربن یونٹ کے اشتراک سے میپنگ کی گئی ہےـ صوبے میں نئے اکنامک ہب بنائے جائیں گےـ

میاں اسلم اقبال نے کہا کہ پنجاب کی تاریخ میں پہلی بار نجی شعبے میں چار سپیشل اکنامک زون بن رہے ہیں۔ نئے سیمنٹ پلانٹ لگنے سے 600 ارب روپے کی نئی سرمایہ کاری ہوگی۔ ٹیوٹا کے اداروں میں فنی تعلیم کیلئے دو لاکھ 33 ہزار بچوں کی انرولمنٹ کی گئی ہےـ

صوبے کی ہر تحصیل میں عوام کی سہولت کے لئے ماڈل بازار بنائیں گےـ میاں اسلم اقبال نے کہ اکہ انسپکٹر لیس رجیم بنالیا صوبے میں جلد متعارف کرایا جارہا ہےـ صوبے بھر میں نئے صنعتی مراکز قائم کئے جارہے ہیں۔

اس موقع پر سیکرٹری صنعت وتجارت واصف خورشید، چیئرمین پیڈمک نبیل ہاشمی، صدر ایوان صنعت و تجارت لاہور میاں طارق مصباح کے علاوہ گوجرانوالہ، فیصل آباد، راولپنڈی، گجرات، سیالکوٹ چیمبرز کے صدور اور صنعت کاربھی موجود تھے۔